川龍大懵行
星期五晚無所事事，同matt上網閒聊幾句，竟然無啦啦話要去行山？！Matt叫我決定地方，我隨口就話大帽山啦，近近地，而且可以上川龍飲個早茶先出發。結果，連點行都未知就訓左。
去到荃灣先衝上政府合署十五樓買地圖睇下路線，上到去都係九點半，個辦事處都係開門冇耐，買左當日要用既「新界西北部」同埋遲Ｄ去印洲塘用既「新界東北及中部」，個職員仲介紹左西貢新版地圖，不過都係用住舊版先啦。買完就過兆和街搭80號小巴上川龍，小巴站竟然異常冷清，唔通係星期六朝早既關係？
上到川龍沿指示牌到端記茶樓。茶樓外觀毫不起眼，只係間普通村屋入面擺哂檯凳。睇網上介紹端記都幾出名，一於坐低試下佢地Ｄ山水茶。果度既服務係全自助，自己開位沖茶攞點心，完全不經伙記之手。不過去到見到檯面有點心紙，可以寫紙仔叫點心，莫非已經變左？
我地去上層露台坐低，沖好茶點好點心，聽住阿伯Ｄ雀係度爭啼（仲大聲過人講野！），呼吸下山上空氣，慢慢嘆茶都幾寫意。我地順便plan好路線，決定由川龍上大帽山，翻過山崗後接觀音山，順道參觀嘉道理農場。臨行前整多碗豆腐花先，幾滑！
足料蝦蛟！
沿住入村條車路（唔係荃錦公路）一直走，一路上Ｄ貨車竟然源源不絕咁駛過！睇黎川龍既工業都幾發達！過村後冇耐到川龍管理站。地圖顯示管理站側有山路上山，可以節省唔少腳骨力，又唔使穿過墳場。唔知果朝我地係咪太眼訓，竟然冇留意到地圖上呢條路，結果懵盛盛沿住條車路兜左個超大圈。果日都犯左好多錯誤，一陣再講。
路邊見樹一影
繼續行沉悶既車路上山，見腳下荃灣市區白茫茫一片，matt部新DSLR今日都係無用武之地喇。冇幾耐到響石墳場。我地要係呢度離開車路，穿過墳場上山。唔知點解Ｄ小徑成日行行下冇左，搞到我地要係Ｄ墳中間左穿右插。大家都唔敢亂講野，快手快腳穿過墳場先敢小休，以免驚動到眾先人啦。
越過墳場後，個山開始冇乜樹，前面係無盡向上伸展既草坡，同埋遍地大石，個景觀都幾開揚，又可以上石影造型照，寫意之極！經過幾百米爬升，終於上到山火瞭望台。唔知係我地個慘樣太驚嚇，定係Ｄ扯蝦聲太誇張，休息緊既一團行友對我地投以奇怪目光！不過佢地都好nice既，傾落知佢地係荃錦坳上山頂再落圓玄學院。之後又同駐守瞭望台既阿叔吹左幾句，比佢一句「嘉道理農場好遠喎」大到！
＠thx Matt
離開左友善既阿叔之後，仲要經過漫長既zig-zag車路先到頂。途中忽然肚餓決定盤坐係馬路中心開餐！成個山頂有好多離奇建築，周圍仲圍哂鐵線網生人勿近咁款。近睇既電波發射站真係好大，仲不斷發出Ｄ滋滋聲．．．沿住車路係咁行，行行下遇到班牛牛係度食草。過左班牛冇幾耐，竟然見到唔應該見到既M145標距柱！
古怪鐵絲網廢墟@thx Matt
不知名山頂建築@thx Matt
我地要係M145之前既小徑離開車路，唔知係咪掛住睇牛食草，竟然miss左個路口。而家唯有行去車路盡頭個亭度轉出去喇，兜少少路咯。
過左個亭就開始狂落山。好鬼甘呀，雙腳開始打電報。太渣！要練多Ｄ先得喇。回望整個山坡Ｄ草穗比太陽染到一點點金黃色，嘩，真係靚過拍戲，我地Ｄ屎攝影術影唔到當日十分一咁靚，所以得閒自己去睇下啦．．．
同實景差好遠．．．@thx Matt
沿路穿過Ｄ小澗，Ｄ樹越生越密，我地係咁落係咁落，落到隻腳酸哂。心諗睇地圖冇落咁多架喎？條路唔多似去嘉道理農場，好似「又」行錯路？！我地Ｄ map reading真係好有危機，好彩今次行錯路都唔會有問題，仲可以落到梧桐寨，如果唔係必call隨時候命。
落山呢段冇乜特色，心入面盤算出年夏天來梧桐瀑布玩水．．．係萬德苑遇到個撞聾廟祝係度聽粵曲，大聲到成個山谷都聽到！萬德苑落梧桐寨呢段都係良好路況既石屎路。最後搭車出尖沙咀同wm食飯，仲見到聞名已久既rosita！完成一日大懵之行旅。
交通：
專線小巴80 - 荃灣兆和街往川龍
九巴51 - 荃灣如心廣場往錦田，於川龍站落車
參考：
http://www.nurs.or.jp/~yide/041205/2004.12.05.html
呢位日本人都行幾多山下！