fanta:para:site

龍脊係介乎打爛埕頂山同雲枕山之間既山脊，屬於港島徑第八段既一部份。路線冇乜大上大落，算係輕鬆之選。如果嫌港島徑第八段路程稍長，可以遊完龍脊之後，係大潭坳退出搭車閃人。有心既可以全走第八段落大浪灣玩水。

今日金鑽陣容出遊龍脊，非常罕見！大家先係筲箕灣補充糧水，再搭巴士入石澳，係土地灣站落車。車站旁就係龍脊入口，非常便利。

可能假期關係，全條路線都頗熱鬧，有好多鬼佬帶狗仔出遊，又有人踩越野單車，仲有一班人係山上放遙控飛機。脊上可以望哂石澳、大浪灣、紅山半島、赤柱一系列港島南區優質地皮，真係一條五星級既睇景路線。脊上相當大風，吹到面都歪，但海風真係爽爆！美中不足既係，今日煙霞太勁，遠少少都白茫茫一片，香港既睛朗天空越來越少見，真係想嗌一句：「還我青天！」

大家踏住開朗既腳步，好快就到達終點大浪灣喇。原本以為睇下海影幾張到此一遊就閃，點知呢個海灘先係今日既高潮所在，完全有離哂題既感覺！

首先係我同german既solo

張學友 & 噴射引擎

怒踢板友 + Matrix

雙截龍®！

嘯海潛龍！

個海灘都幾多人，唔知有冇人留意我地？不過大家都已經發揮到渾然忘我既境界．．．

本來行山都冇乜野，打完一輪功夫反而腳仔軟，火速坐van仔出去食飯醫肚。

交通
新巴9號：筲箕灣至石澳，於土地灣站落車。
紅van來往大浪灣及筲箕灣。假日亦有新巴9號班次繞經大浪灣。

This entry was posted on Monday, December 26th, 2005 at 09:46 and is filed under 地方．行旅. You can follow any responses to this entry through the RSS 2.0 feed. You can leave a response, or trackback from your own site.