fanta:para:site

初三與Matt即興遊獅子山同望夫石。我地去到黃大仙站，見周圍人頭湧湧，原來黃大仙祠已經實施人潮管制，好誇張。我地沿沙田坳道上山，仲要係竹園食個tea先至慢條斯理上路。果陣已經午後三點，都幾擔心會行到入黑，不過我話市區有光唔怕既(哈)。

條沙田坳道都幾辛苦，一路keep住狂上山，段路仲要勁多車，原來山上有寺廟，仲有好多鄉村，最後仲可以去到馬鞍山，勁。上到咁上下見到個涼亭同埋半島獅子園既牌坊，沿馬路行上少少就見到郊野公園指示牌，我地就係呢度接麥徑第五段，行到中途會有上獅子山指示牌，再行數百級樓梯就到隻獅子度！

沿路勁多高壓電塔

獅子頭氣勢好霸！南坡完全係90度既懸崖，見到都頭暈，仲要見到d石上set左鐵鏈比人攀石上來，驚！係石上飽覽九龍半島全境，真係心曠神怡，except d 常駐既煙塵．．．

獅子頭

九龍啊！@Thx Matt

落獅子石接回麥徑，行到中途見老董提字既「香港回歸紀念亭」，果度係幾條路既匯合點，沿望夫石路牌落山。天色漸黑，我地又冇帶電筒，係昏暗既山谷中不禁加快腳步，以求天黑前行完啦。

望夫石遙望沙田

望夫石比我地想像中大！真係大得幾離譜，一大舊石就咁楝左係山上，奇。舊石基部好多塗鴉，地下仲有好多遊人既垃圾，今朝應該勁多人。

快步落山，冇幾耐就到紅梅谷燒烤場！搭巴士出九龍塘食飯，聽日又要返工啦，灰！

沉思落日的Matt

寧靜的索罟灣，其實那裡有很多海鮮酒家，熱鬧非常！

今日大年初二，與家人到南丫島閑遊。一年不見，南丫島沒有甚麼變化，一路上仍然遇到很多貓狗和鬼佬。唯一不同的是山上新建了風力發電站，坐船離遠時經已見到。看見它隨風不斷運轉，似足個大風車，意頭甚佳！

新正頭，祝各位網友：

The Movie Of Your Life Is An Indie Flick

You do things your own way - and it’s made for colorful times. Your life hasn’t turned out how anyone expected, thank goodness! Your best movie matches: Clerks, Garden State, Napoleon Dynamite

未聽過它提及的那幾齣電影。

幾小時後便與wm出發，上京五天。

很睏很睏！還有點緊張！哈哈！

Poon由美國返港渡假，不知不覺已經過左兩個星期。係佢留港既最後一日，Matt、Poon同我三個人去左行山(Hole返完夜班過勞唔去)。因為時間唔早，Poon又要返屋企食飯，所以大家都係散步心態上陣，由Matt帶路行愉景灣(稔樹灣村)到梅窩一段山徑。

當日天氣相當寒冷，天色陰沈。我地一行三人搭地鐵到欣澳站轉巴士入愉景灣。我第一次入愉景灣，果度環境的確唔錯，寧靜舒服又有戶外空間，仲有好多人帶狗跑步踩單車等等，真係活脫脫一個洋人社區模樣。

穿過鐵絲網，係愉景灣隔離既就係稔樹灣村。條村都幾窄長，就起左係山坡同沙灘中間，每間屋都係對住個海，隔離就係細細塊菜田，仲見到地下一札札柴枝，個feel都幾遠離繁囂。幾有趣既就係見到有班菲傭係個村屋簷蓬下面唱Ｋ同打乒乓波，好似果度係佢地既俱樂部咁。

條村都幾多狗，而且Ｄ狗仔仲會走過來聞你，企起身想扒上來，非常熱情。不過我少接觸動物，Ｄ狗湊個鼻埋來時都令我有Ｄ緊張！可能洋人路過經常會逗狗為樂，搞到Ｄ狗咁鬼熱情。或者係我太少親近動物吧。

沿住條村路慢慢上山，山徑路邊竟然泊左架荒廢多年既老吉普車，唔知係咩年代，勁新奇。

@Thx Matt

離開村路後接一段陡斜車路上熙篤會聖母神樂院。沿路樹幹掛上十四個十字架，順序標上羅馬數字及圖片，象徵耶穌的十四苦路(Stations of the Cross)，好貼切。神樂院環境極清靜，可遠眺山下海灣，小橋流水林蔭片片，學Poon話：「呢D先係諗野既地方。」

離開神樂院，快步上頂。山頂風大極寒，有一小亭及亂石供取景胡鬧，亦可俯瞰銀礦灣。大家諗起中學時每年聖誕一定到銀礦灣燒野食（果陣仲未有東涌線，要係中環搭渡輪入梅窩），後來先移師到Dr. Lau屋企天台，真係從不間斷。不過今年冇搞了，大家都各有各忙吧．．．

睇緊銀礦灣龍穴所在！@Thx Matt

沿小徑下山，經過銀礦灣沙灘，見到個燒烤場整到勁靚，真想係度燒番次。沿海傍行到碼頭，搭巴士出東涌，係車上大家傾左好多野，況味十足。

交通：
愉景灣：東涌站及欣澳站有愉景灣巴士直達。

參考：
http://www.hktraveler.com/route/route55.htm