黃金孖指大戰靈猴
Saturday, April 8th, 2006食完午飯冇野做，call左matt出來散步。先去荃灣搭82小巴上城門水塘，等左成半粒鐘先有車！落小巴後沿車路行到主壩旁燒烤場，見麥徑第六段牌樓即上孖指徑。
行大概十分鐘左右就會見到路邊石屎建築既城門碉堡，佢地係二次大戰時期醉酒灣防線既一部份。每條地道都用上英國街名命名（例如個指揮部就叫做Strand Palace Hotel！）。有好心人係地道入口貼好地圖同提醒遊人保護戰時古蹟，讚！
Regent Street 及 Shaftesbury Avenue 地道
指揮部叫Strand Palace Hotel，應該係世上最頹既Hotel！
有心人張貼的地道地圖（放大地圖）
越過山頭後到達金山車路，呢度不愧係馬騮山，沿路d馬騮三五成群，我地呢d人類反而變左小數族裔。佢地真係乜都爬一餐，樹枝屋頂路牌欄杆都比佢地玩勻哂，真係羡慕佢地超強既彈跳力同超充沛既體力！雖然政府已經立例禁止餵馬騮，但我地仲見到有人係車上餵食。呢d人真係爆自私！！為左自己一時貪過癮，搞到d馬騮過份依賴人類，破壞原有既生態環境，絕對唔要得。而且咁做搞到d馬騮見人就以為有野食，對其他遊人都有一定影響！沿馬路一直落山，去到九龍水塘堤壩，夕陽晒落彎弓型既堤壩上面，ｄ馬騮就係欄杆上面晒太陽。遠眺水塘盡處可見貨櫃碼頭。
九龍副水塘，可遠眺貨櫃碼頭
馬騮在堤壩上晒太陽
出到大埔道竟然塞滿車龍，沿大埔道、龍翔道出九龍狂食塵，轉折之下終於落到長沙灣既南華中學。
龍翔道食塵之旅．．．
是日終點：長沙灣南華中學
返到市區，唔知有乜搞好。matt話蘇屋果頭有檔豆腐花好正，決定一試。間野前舖後廠，舖面好街坊好古舊，熱豆花食落好滑，ｄ煎鑲豆腐都好有魚味，舊豆腐煎完熱辣辣，正！食完豆花沿青山道行去黃金附近食飯，上黃金睇下LCD monitor，心動想換番一部。
逛完黃金返歸，完成一日行街仲耐過行山之行旅。
漁農自然護理處－金山戰時遺跡
香港海防博物館專題研究：二十世紀香港之棱堡（參閱丁部：城門棱堡 SHING MUN REDOUBT）
